مليشيات الحوثي تحاصر تعز وتمنع عنها البطاط والطماط وتسمح لحمود المخلافي بإدخال المدرعات والعربات والدبابات ؟!

كتبها / فارس أبوبارعة

هاه..تعز محاصرة من قبل مليشيات الحوثي والمخلوع ..ياغارتاه
طيب…صعدة مش محاصرة من دول العدوان..ياسلام
طيب..اليمن كلها مش محاصرة..تعز فقط محاصرة برآ وجوآ وبحرآ..ياعيوني.
طيب..تعز وصلت لها صواريخ سامه وقاتلة ومحرمة دوليا كما قال المخلافي ومدرعات ومصفحات وهم فرحانيين بذلك..ماشاء الله
طيب..مش تعز محاصرة كيف وصلت هذي المدرعات والمصفحات وتعز محاصرة..تخيلوا صعدة وباقي المحافظات الشمالية لم تصل اليها طلقة رصاص او كيلوة دقيق وقارورة سمن لا رسمي ولاتهريب وهي مش محاصرة بينما تعز محاصرة ومن كل الجهات من قبل مليشيات الحوثي ومع ذلك تصل اليها المدرعات والدبابات والصواريخ والمصفحات وكل ما لذ وطاب وهذا وتعز محاصرة ياغارتاه ويوصل اليها كل هذا فكيف لو تعز مش محاصرة..اكيد بتوصل اساطيل حربية وبوارج عسكرية وسفن حربية الى جبل صبر ..هذا اذا كانت تعز مش محاقرة بس لانها محاصرة وصلتها دبابات ومدرعات ومصفحات ..على فكرة..مافيش اي فضولي يسأل المخلافي وباقي المرتزقة واعلاميين الدفع المسبق ويقلهم..كيف تقولوا تعز محاصرة وانتم تنقلوا دبابات ومصفحات وعربات ومدرعات وعاجزين تنقلوا سلتين طماطم وسلة بطاط وعلبتين سمن ونص كيس دقيق وقطعه سكر وقطعه رز ..يعني نقلتوا كل هذي الاسلحة ومليشيا الحوثي سمحت لتعز تستورد هذه الاسلحة الكبيرة التي قدمت الى تعز مشيآ على الاقدام..قصدي على الكفرات لما داخل تعز وراس صبر وفي نفس الوقت المليشيات الحوثية تسمح بدخول السلاح وتمنع الغذاء والجانب الانساني…عد شي عقول تقدر تتجابر وتتحاكا وتحط مثل هذه الاسئلة الخفيفة دم على من يتحاكا عن حصار تعز من قبل الحوثي للمواد الغذائية ويسمح لهم بدخول الاسلحة التي يقتلوه بها…هيا احنا والجنان..وين فكري قاسم يفسر لي خبر اصحابه وحمزة الكمالي يشرح لي كيف دخلت المدرعات والدبابات يمكن يقلي جسر جوي ويمكن يقلي عن طريق مخفي وانا يمكن اقله اذا دخل السلاح جوي فليش ما يدخل الطماط جوي واذا دخل من طريق مخفي ليش ما يدخل البطاط من الطريق المخفي ذاته ..يا خبرة انا اتحداهم واتحدى العالم كله يرد على هذه الاسئلة…اذا تعز تشتي بترول قولوا لهم اليمن كلها بدون بترول بسبب الحصار وان فارس أبوبارعة آخر مرة عبأ سيارته دبة بترول قبل ثلاثة شهور..اذا تعز تشتي غاز قولوا للمخلافي اليمن كلها بدون غاز بسبب حصار العدوان..اذا تعز تشتي ادوية قولوا لهم ان صعدة قد اغلقت أخر مستشفى واخر وحدة صحية قبل اربعة شهور وان صنعاء قد اغلقت كثير من المراكز الطبية وباقي معانا مستشفى الثورة فيه ثلاث شرنقات لاغير عاد انتم خارجتوا احسن مننا ..طيب ماهو تشتوا بالمفتوح من هذي الحملة الاعلامية الممنهجة والتضليلة..طبعآ الهدف معروف وكل الاهداف معروفه..السعودية اغرقت اليمن بالدواعش والاسلحة وسلمت المدن والمناطق الجنوبية لداعش والقاعدة والمتطرفين وتشتي تكبس تعز بمختلف الاسلحة والدواعش وكذلك مارب وغيرها وهذه هي الاهداف المرسومة للعدوان اغراق اليمن شمالا وشرقا وغربا وجنوبا بالحرب والقتل والدعاشيش والقواعد والثارات والحروب ثم تنسحب من اليمن وتعلن ايقاف الحرب والعاصفة التي قالت من اجل هادي وشرعيته واعادته الى صنعاء ثم تترك الحرب بالوكالة للمرتزقة داخل اليمن..مثل المخلافي واشقائه في ولاية مارب العرادة وفي الولايات الاسلامية الاخرى في المحافظات الجنوبية..
المهم يا مخلافي ويا مرتزقه اشتيكم تعلموا أن الناس في صعدة وحجة وصنعاء وعمران وذمار وغيرها محاصرين حتى من النوم مع زوجاتهم واللقاء باولادهم مش بس محاصرين من الدقيق والبترول والدواء والغذاء…محاصرين من الحياة ومحاصرين من الاوكسجين ومحاصرين من كل صغيرة وكبيرة الا الكرامة والعزة والشموخ والوطنية والاباء والصمةد والشجاعة والشرف والرجولة التي يفتقدها خصومهم لم يستطيع اي كائن في هذه الارض ان يحاصرهم منها وهذه الصفات يتم استيرادها من ميراث مجد اصيل ورثناه من اجدادنا واباءنا …