((مسكنك يالغالي))
مسكنك ياالغالي وسط جـاش مغليـك
بين الضلوع الحدب موقعـك يازيـن
مديـت لـك شريـان قلبـي يغذيـك
وزرعت لك بالجـاش ورد وبساتيـن
وضلوع صدري من العواصيف تحميك
والقلـب قصـرك لانويتـي تباتيـن
ونبضات قلبـي مـن سناهـا تدفيـك
ليـا غفيتـي بيـن ذيـك الشراييـن
والفكر لـك فـي كـل حـزه يقديـك
دليلـك اللـي يدعمـك بالبراهـيـن
الحب راس المـال مايصرفـه شيـك
متوازيـه توزيعتـه بيـن شخصيـن
والشيـك ماضنـي تطولـه ايـاديـك
الا اذا اعلنتـي فــراق المحبـيـن
واذا نويتيـهـا فـلانـي بجافـيـك
لكـن بذكـرك العهـد قبـل عاميـن
بـاروح عنـك بـس مانـي بناسيـك
مادامني موجـود مـع نـاس حييـن
ونتـي لابـد ان الليالـي تصحـيـك
حتـى تكونيـن انتـي اللـي تعانيـن
ون قلتي ارجع قلـت مـاوالله اجيـك
مادام فـي السابـق نويتـي تخونيـن
قد كنت مـن دم الشراييـن معطيـك
وصخرت لك كل الصعايب من سنيـن
ونتـي نسيتينـي ونـا ميـت فـيـك
واليـوم روحـي ياعسـى ماتعوديـن
النفس طابت يـوم شافـت مواريـك
بلقـى بدالـك لكـن انتـي ماتلقيـن
عـسـاك ماتلقـيـن والله يجـازيـك
الـود نـادر والبـشـر بالملايـيـن
مـادام بعتـي واحـد كـان شاريـك
اليوم باعـك وانقضـى باقـي الديـن
